Alitu legger’ di la natura
Si tu zeffiru allegrettu.
Quandu tramonti a la frescura,
Marinu, lu to soffiu è dettu ;
Invece Muntese è chiamatu,
Quandu da li monti impiaghiatu.
A l’aura, tu, ombra di ventu,
Delicatu trenni u fiore guazzosu
Chi, gocciulendu lacrime d’argentu,
Lu capu pesa fieru e muscosu
Mentre la farffalletta core
A dalli un primu basgiu d’amore.
Cun grazia jôchi di mille dite
Frà li boschi a verde frondura ;
Da tè cerminate, le foglie unite
Contanu in giôia la natura,
Cun amurosu fremu più divinu
A lu cantu unitu dogni acellinu.
A lu mondu sì, da agnunu amatu,
Umani, insetti e bestiame ;
Cio ch’interra respira natu ;
Arburi, fiori, ortulame,
Tuttu n’è di tè amurosu :
Terra, onde e celu luminosu.
C’un brio sussuru lente soffj,
Carezzi prati verdi e fiuriti,
E vele di le navi ingonffj ;
Dolce, faci di l’amanti uniti
Cresce l’amore in le carezze
Di lu mondu in gioia, le bellezze.
Mentre in l’ardori statinosi
L’aria n’è pisente e fucosa,
Che lassi, l’esseri stanu ascosi
Da sulani raggi e turba moscosa
Vai tu, amabile zeffiru,
A tutti cresceli lu respiru.
Aria de peste e muschini cacci,
Suffraggi l’oppressi affannosi,
Di l’orridi scôrni l’oduracci
Spazzi l’effetti perniciosi.
A l’aghia soffj in la palmulata,
E da tè la paghia n’è spulata.
Di le sfumate faci tôrchie turchine
A u celu le pesi, veli leggeri,
Alti, sfilati, pôi infine,
Prestu svaniti cume i penseri
Di l’innocente infanzia che la mamma
Indôrme a lu contu chi l’annanna.
V. G. d’Altimonti.
Retour vers la page : Vittorio Gianviti
