Stancu di luttà cun menti e mani
Per scioglie l’intrecciu di sta vitaccia,
Stava dormendu for’di strazii umani,
Quandu m’apparse luminosa faccia
D’una garbata donna distinta e fiera.
Bella, serena e di neru vestita,
Ma, cume Diana scesa d’alta sfera,
Era, in latu, d’una Muvra seguita.
Sopr’a lu coppiu una ninfa alata,
Di rosule purtendu la curona
Tenia la lira a’ perle ornata
Di geniale musa chi canta e sona.
A tale apparì forte cummossu,
Gridai : Cirnu !...Muvra !...E tu o Musa,
Dea regnente in Parnassu Corsu,
A tutte salutu cun gioia cunfusa !
- Perchè, disse la donna, ô d’Altimonti
Poni le to’menti in tal’manera
Che niente in corsu più ci conti ?...
Musa, Muvra, eiu pè l’amata schiera
D’i fratelli Anfarti Cirneani,
In coru ti purtemu lu salutu.
Ma cumu taci tantu frà i scrivani
Chi mi danu tutti fidu aiutu ?
Di la penna, forse, hai persu l’usu
O di famiglia corsa la memoria ?...
Perchè n’un s’è pueta d’alta gloria ?
Risposi : « Di questu n’un sia accusatu !
Un miseru pueta sò, per certu,
A stà in lu mezzanile, cundannatu,
Ma nò per sa ragione, da u cuncertu
Di li scrivani Corsi stò luntanu !
Accusa, ô mamma, solu le vicende
Di stu porcacciu mondu crudu e vanu
E per stantà lu pane, e mio facende ! »
Riprese mamma Cirnu, gravamente
Ma d’un surrisu fendu luce clemenza :
- Per scrive, in fatti, ti credu veramente
Di quieti momenti, a la schersenza…
Stenta ! chi stentà dà pura gloria,
Ma sai ch’in la lutta pe la vita
Un è mai cumpletta la vittoria
Di quellu ch’un cumbatte e tene lita
Per l’onore, prugressu e geniu paisani !...
Sai che d’alta Foce in la furesta
Dumenica passata i me scrivani
Fecenu merendella in bella festa ?
E tu ô d’Altimonti, a si Fratelli
Un deste mancu mottu cristianu !
Sultantu à tè ci pensonu elli,
Malgratu u to’ silenziu cusì stranu !
Di Nottini hai intesu tonente voce
Da li monti scesa per seri e valli
Fin’a la piaghja, sparta da Foce
Chiamendu li Corsisti, pè salutalli ?...
Aiò ! per ogni lutta un femu conti ;
Sveglia-ti e veni ô d’Altimonti !
… … … … … … … … … … … …
Cusì vidi, intesi e mi svegliai
Prontu per ubbidì a l’amata chiama,
O MUVRA vengu à tè, ma ben’tu sai
Quantu di corsu amor’ tengu la fiamma !
Di côre ti salutu, cun Cirnu e Musa
E a li merendoni facciu scusa !
V. G. d’ Altimonti
A MUVRA
Giurnale di e pieve di Corsica
Dumenica u 7 settembre 1924
Retour vers la page Vittoriu Gianviti
