Muvra muvrella fiera e pensosa
Che l’alti-monti di Cirnu abiti,
Quandu di l’agula maestosa
C’un dolce sguardu lu volu seguiti,
So sicuru chi dice u to côre :
- Dov’ esse quella di l’Imperatore,
Chi cerca « l’omone », c’un tristu gridu,
O, per sti lôghi, a rifà lu so nidu…
Nidu di geniu e curaggiu più fieru
Duve, digià, ha cuvatu la sorte :
I Sambucucci, Gaffori, Sampieru,
Bonaparte, e talenti d’ogni sôrte…
Ma quandu in la valle guardi, attristita,
Di corbi racchiùdi lu vôlu neru
Ti senti, ô Muvrella, tremà la vita :
E forte strintu da un gran’ penseru
Sò sicuru chi dice u to core :
- Luntanu da mè, quessi, ô Signore !...
Quandu cuntempli u gran’ orizzonte
Duve lu sole spicchia a matina,
Chi d’oru tinghie u to altu monte,
Di lume infiara la bassa marina,
In gioia, sicuru, dice u to core
Una prighera a u Creatore…
Quand’ una nave a le bianche vele
Mezz’ a l’ onde e u celu turchinu,
Ti rimiri c’ un sguardu fidele
Di li to occhj acuti e più fini,
Dice u to core in sa circustanza :
- Dev’ esse quella di l’esperanza…
E gioiosa dumandi a Petru Rocca :
- Da duve vène sa nave apparita ?
Ellu allôra lu fronte si tocca,
E d’una voce per tè intennerita
Dice : “Sa vela che u mare bilancia
Purebbi esse una nave di Francia…
- Sell’è di Francia, dice u to core,
Per noi dev’ esse piena d’ amore…
Ma, a to crienza Rocca prevede
E dice : « O Muvré, quèssa un la crede !.
Sell’è di Francia un c’è che filanci
Cun percettori e puliticanci,
Omi sprezzenti e senza côre,
Ridendu quandu Cirnu si mòre !
Credimi puru a mio Muvrella,
Per fà l’affari di Cursichella,
Un ci vale che Corsi in Cirnu nati ;
Di spiritu e di sangue creditati
Da l’ antichi eroi in gloria spariti.
U restu so guai, dulori infiniti. »
Tu, Muvra, allôra, dici di core :
- Quindi circhemuci un salvatore !
E Rocca risponde, cunvitu, fucosu :
- Li semu appressu senza riposu.
A sai, o Muvré, d’omi un mancheremu,
E sia cunvinta chè truveremu
V. G. d’Altimonti
Retour vers la page : Vittorio Gianviti
