TUTTI BIRBENTI

 

Sprezzente, lu riccu di tuttu gusta.

Dice lu pigru : « Quessa un’ é ghiusta ! »

Risponde lu tecchiu : « A ch’un ha, ne stenti ! »

In realtà, un c’é che birbenti.

 

Ognunu strappa d’unghie e di denti.

A lu débuléllu, dice lu forte :

« Fora di qui, vai a pienghie la sorte ! »

Pienghie nun sanu i corpi  cuntenti.

In realtà, un c’é che birbenti.

 

Chiamate a l’aiutu I vostri parenti,

In la risposta, mostranu annoiu.

Dice l’amicu : « D’ognunu lu soiu ! »

Tutti vi lascianu espostu a li venti.

In realtà, un c’é che birbenti.

 

Si cun travagliu e sforzi custenti

Fiurite voi e la vostra famiglia,

Tutti, all’intornu, rodenu inviglia

Préghenduvi sempre mille accidenti

In realtà, un c’é che birbenti.

 

Dice l’eléttu a i so’ vutenti :

“Statene allégri, o Camerchioni,

Veneraghiu a l’altre élezzioni !”

Fin’ a tantu arrutate li denti.

In realtà, un c’é che birbenti.

 

Si, per maraviglia, fra cori cuntenti

Un bon Cristianu déssi assistenza,

Quelli succorsi, in ricunnuscenza,

Diventanu dopu tutti arrughenti.

In realtà, un c’é che birbenti.

 

Eo però, sinceru e di core,

A Cirnu prégu pace e prugréssu,

Mai di zerga, li pigli un accéssu

Ma faccia a la Francia vede l’errore

Ch’ella cummétte lasciendula more

 

Di tutti li Corsi, per fassi onore,

Prégu unione di pienu accordu

A quelli di quindi, pe’ lu ricordu

Quelli di Francia uniti d’amore

Senza chimére in vanu discorre.

 

A la lingua corsa, prégu furore

In terra gradita da ogni natu.

E questu, in célu più tardi cullatu,

Ch’ellu la parli a u nostru Signore ?

Ciò chi ghié dettu, a prégu di core.

 

 

V.G. D’ALTIMONTI

 

  

Retour vers la page : Vittorio Gianviti