di u futuru Cunsigliu
a Populazione di Pietra-di-Verde
a l'occasione di l'elezioni Municipali
(maghiu 1925)
Rima di V. G. d'Altimonti
A tutti li bon'paisani
Oghie femu chiari inviti.
Qui per fà fiurì' la Petra
Dichiaremu esse uniti.
S'ell'un bastanu li detti
C'è lu Notaru a Gianviti.
Ellu ha: cherta bollata,
Codici cun testimoni
Calamaru e penna fine
Per scrive cundizioni
Stipulà chi noi a tutti
Deremu sutisfazioni.
Anzi, davant' a Notaru
Pronti simu a fà prumessa
Ch'in la « Piazza-di-lu-Pianu »
La meria serà messa;
E l'altre prumissioni
Sentitele appressu a quessa :
Serà la nostra meria
Pien' di luce e d'accoglienza,
Bella in' ordine tenuta,
Cun onore, puntu e scenza,
E da li favori o contri
Nun ci serà differenza...
Differenza, ben' intesu,
Per applicà ]a justizia;
Ma s' ell' è per fà pieceri
Serveremu l' amicizia
Avanti la lega ritrosa
Chi c' intima nimicizia.
A' cantu lu nostru Cunsigliu
Di dodeci Municipali
Ci serà quellu di l' « ottu »
Per' l ideie iniziali
Prugetti amministrative
E travagli geniali.
Di li morti gloriosi
Onorà lu monumenti
N'aimu digià mostratu
Lu nobile sentimentu
E da noi riveritu
Serà cum'un Sacramentu.
A tutti li Cumbattenti
Onorà bulemu in coru ;
Li so' nomi in grossu scritti
Seranu a lu « ibru d'oru »
In meria cunservatu
Cume reliquia-tesoru.
Bulimu ch' in lu paese
Ci regni la fratellanza;
Troncà tutte le chimere
E chi l' infama lagnanza
Di fa colà lu velenu
Mai abbia circustanza ;
Chi da lu « Pianu » a lu « Vadu »
N' un ci sia diversione :
Un paese solu, unitu;
Cun la stessa affezzione
Lu mere e lu so' cunsigliu
Teneranu in'azione.
Di tutti li bon' mistieri
L'erte sia riverita,
Chi lu spiccu nun bà sempre
A ghiente ricca o struita,
E la nobiltà nativa
Cade s'ell' un è pulita.
Nasce d' un ceppu famosu
Un' è meritu personale,
Chi lu nobile cunsiste
In lu ben' contru lu male;
Lu restu è puru azerdu
Chi senza virtù nun bale.
Bulimu di lu prugressu
Avvicinaci a la fonte,
Cun la so' acqua di scenza
Richiaraci ben' la fronte
E per cogliene le perle
Tenimu le mani pronte.
Bole dì, « Pietra-di- Verde »
Pietra ornata di verdura !
Di sustene sa rinoma
Noi n' averemu cura
E tutti la chiameranu
« Gioiellu di la natura »
Bulimu : strade e stradoni,
Muri, chiassi cun ricciate,
Le nostre piazze pulite,
Ancu cu le so' posate,
Erburi pe' la traversa
E tutte le passìghiate.
Bulimu chi le funtane
Tiranu a pien' cannone ;
Una al' menu per quertieru
Noi le bulimu pone,
L'acqua ava cusì stantata
Deremu a discrezione.
Bulimu d' un lavatoghiu
Fanne la bella struttura ;
Chi le donne a la fìumara
In lu corrente e ghiacciura
Un sianu più esposte
A chiappaci la puntura.
Ci sera bell' arrangiatu
A cantu' su lavatoghiu,
Destinatu a l' enimali,
Un pulitu beitoghiu,
Ch' ell' un s'abbia più da corre
Appressu lu lacrimatoghiu.
D' una casa comunale
Biderete le facciate.
Seranu : Posta, ghiustizia,
Scole, meria. alloggiate.
E d' una gendermeria
Le famiglie accasernate.
Bulimu li proprietari
Intesi cu li pastori
Un ci sia più prucessi
Ne più dannificatori;
Ma paisani fratelli
D' ordine e travagliatori
Bulimu ch' in lu paese
A dimora sempre stia
Un duttore, avanti tuttu,
In cu la so' farmacia ;
Poi tutti li servizi
Chi di dirittu ci sia.
Bulimu lu Campu-Santu,
In c' un effettu pietosu,
Intratenelu a dovere
E fallu più spaziosu,
Perchè di l' osse passate
N' un s' inquieti lu riposu.
Bulimu la nostra chiesa
E lu so' Campanilone,
Le so' tre linde campane,
La so' piazza a muraglione.
E lu so rologiu in merchìa,
Sustene in devozione.
La cappella « San-Pancraziu »
Noi ben' l' arrangieremu ;
Ancu una fiera a l 'intornu
Tutti l' anni ci feremu,
E li paesi vicini
A cuncorre chiameremu.
Bulimu chi lu paese
A notte sia alluminatu
In' ogni scornu un lampione
Da noi serà piazzatu
Eppò ancu ad' ogni casa
U lume li serà datu.
Una pompa per incendi
A ci bulimu procurà;
Per manuvrala, in paese
Balenti un ne mancherà;
Senza ricorre a le pozze
L'acqua pronta ci serà
Infine bulimu insegnà
Tutti li mezzi moderni
Di vive cu lu travagliu
Ma senza più sforzi inderni,
Racoglie cun abbondanza
E vende cun sicuranza.
Per tutte ste belle cosi
Noi seremu aiutati:
Da li Pitti avanti tutti,
Senatori e Deputati,
Chi diritti un ci ne manca
E seranu revendicati.
Quandu, ordine e prugressu
Risplenderanu in paese,
A vedelu chiameremu
Ghiente straniera e francese,
E seranu e nostre chiame
A la stampa, sempre intese.
Di tutte ste prumissioni
Femune puru un cuntrattu.
E per più di sicurtà
Aghiustemuci stu pattu :
Si non' esecuzione
Si derà demissione.
Retour vers la page : Vittorio Gianviti
