A TIMPESTA

L’elementi, partiti sò à la sferra,

Tutti in rivôlta, neri e scunvôlti,

Quelli di celu, di l’onde e di terra,

Da lu micidiu rabbiòsi e sciôlti !

In furia, sò l’acque, pè sa maraglia;

Di Cirnu à l’assaltu sò pigliate

E côsti à l’intornu e la giraglia

E piaghje, le calette e le jittate.

Mugghja la foce  per’ valle oscura,

Cun lagni venuti da lu profondu

E striscianu li lampi la bughjura.   

Da su tumultu inquietu stà lu mondu,

Quandu ch’in celu si sò scatinati

E scoppianu li toni vultulati

A più pudè ne fala…piòve e pare

Che l’acqua, inaffôcu scatulita,

Sia tutta quella di lu mare

A quella di li fiumi riunita !

Fala cum’un torrente ancu lu Chiassu,

Onde sò le piazza e le stradelle,

Ingonffianu li vadi e le vadelle,

Salta lu vaglinu, di sassu in sassu.

Tuttu pare in disperu fughje la sorte

Gridendu : spavecchju ! a lu succorsu !

Pienghje lu ventu in lu perscorsu :

O abissu ! scumpientu ! malamôrte !

U fulmine ribomba in un fracassu

Chi pare cunduttu da Satanassu,

Muri falàti, strunchera di gambòni,

Rabbia di venti, terramòti e toni,

Arburi intieri, terra e legnàme,

Scôgli e baschicci di môrtu bestiame,

Tuttu ne vultula versu lu fiume ;

E mentre la saetta face lume,

Ellu da’lu lettu salta stizzòsu,

Schjuma, bolle, rugghja, scappa terrosu,

Trascinendu in massa à la marina

Ciò chi da’muntagna parte in ruina !

In tale tumultu trema la ziglia,

La casa, li vetri e… la famiglia.

Strinti si ne stanu à lu fucone,

U babbu, la mamma e la marmaglia,

Prighendu cu minnànna e cu babbone

Che San-Pancraziu arresti la battaglia,

Spinga su furore cusì  spaventosu...

Sottu la panca u cane stà pensòsu

Sopra c’è la jatta inchierchjulàta,

Da le candelle a casa è adundàta.

Ancu li topi inquieti sò in granaghju,

A capra, lu sumeru e lu pullaghju;

A lavu è digià lu carciulellu

Duve nuta e grida lu purcellu…

Notte d’angoscia, solu, in la prighera

S’asconde lu côre ch’in Dio spera

VG D’ALTIMONTI

Retour vers la page : Vittorio Gianviti