12 - Inaugurazione di u monumentu a i gloriosi morti di Pietra-di-Verde

Di le sacrate sfere, alme beate

Tutte quelle d’eri à seculi scorsi,

Sopra di noi, in preghera mossi,

D’un placidu volu oghie spianate.

 

D’ogni tempu andatu, defunti amati

Intornu qui venuti fate schiera

Per scorta d’onore à l’alma fiera

Di quelli in gloria morti e laudati

 

In lacrimosa festa qui inchinati

Umuli mortali o paisani

Tacinu li pianti chi son’ vani

Ma sianu da noi adorati :

 

Di Pietra l’eroi in gloria uniti

Fieri paladini in celu eletti

Da lu Signore accolti prediletti

Fra l’anghiuli e li santi favuriti

 

Ô verdi frondure, boschetti, acelli,

Luminosu sole, stelle e luna,

Zefiri, aura bionda, notte bruna,

Chiare sorgente e fiori piu belli

 

In un mischiu di gioia, doli e dolori,

Surisi e suspiri, gemiti e canti,

Di Pietra esaltate l’eroi fanti

Cun varii cuncerti e ricchi splendori

 

Da cime « Mont’ Altu » e « Sant’ Appianu »

A valle « Acqua-d’Orsu », l’ecu dolente

Diga in eternu prighera ardente

Da lu « Vadu » stesa fin’ à lu « Pianu »

 

Olmu gigante di seculi annosu

Sempre manteni lu pede profondu

Dura qui tantu chè dura lu mondu

Di ramu riccu e fremu amurosu

 

Di Sant’ Elie campanile fieru

Chi porghj à lu celu la santa croce,

Sempre risonga l’amata voce

Di le campane in gioia o disperu

 

Sempre tu sia guardia sincera

Di stu santu logu terrenu amatu

E di stu monumentu qui piantatu

In segnu di ricordu e di prighera

 

Martiri caduti cun sacratu amore

Di curaggiu leoni, santi di virtù,

Fuste, ricchi fiori di vita e gioventù

Falciati spinti in campu d’onore

 

Per patria, fede, ghjustizia e libertà,

Fù lu vostru sangue in terra sparsu

Ma salvaste, o prodi, l’universu

Da l’Alemana turba d’iniquità.

 

Savignoni Maria Innocenzi nata

Chi fù cu lu « Balkan » in mare affondata ;

Antomarchi, Casanova e Castelli,

Dui Calendini, Ciancioni, Chiarelli ;

Ferrari, Ferali, Filippi, Gianviti

I dui Mucchielli fratelli uniti ;

Giacomoni, Massei, Rossi, Leoni

Massoni, Straboni e tre Savignoni

Frà si tre, Cesaru e Petru fratelli ;

I dui Natali ; e dui anch’elli

Spinti à l’onore, i fratelli Valery ;

Nicolai, Toracca, Innocenzi, Pieri,

Pancrazi, infine !... Eroi chiamati

Trenta-dui site martiri amati

 

Di voi lu nome, un picchiu à lu Côre

In la prununcia a noi ci ha datu ;

Ma di curaggiu sultantu armatu

In silenziu rugge lu nostru amore !

 

Cun caru sangue scritta è la storia

Ma i vostri Cumpagbni chi fun’ guerrieri

A noi uniti, qui, tristi e fieri

Tutti vi vendiconu cu la vittoria

 

Si dunque di voie eroi, cantata

L’eterna gloriosa e sacra salma

Duve dolorosa porghje la palma

La Francia chi da voi fù salvata

 

A la vostra memoria sia unita

Quella innocente donna sfurtunata

Chi, di la torpiglia assassinata,

In mare cu lu « Balkan » fu supellita

 

Fra voi in celu ella riprisenta

Di Pietra le mamme adolorate

La so’ alma dunque atturniate

Perchè di la so’ sorte stia cuntenta.

 

Possi la Francia da voi salvata

Di côre gratu porghje la manu

A Cirnu valente e fà ch’invano

N’un sia di voi la vita data !

 

Di Verdun l’eroi Corsi valurosi

A quelli di Ponte-nôvu, la memoria

Tutti s’unisca in la stessa gloria

A quelli d’altri ncampi sanguinosi.

 

Occhj lacrimosi, dulurosi côri !

Di mamme, babbi, spose, orfanelli

E quelli fraterni, di vecchj è zitelli,

Tacinu li pianti e li dolori.

 

Ch’in terra ogni cosa e passagera

Solu in’ eternu è luminosa

In celu accesa la luce gloriosa

Chi dà la fede in Dio e la prighera.

 

 

V.G.  D’ALTIMONTI

 

 

Retour vers la page : Vittorio Gianviti