LE PRIGIONI DI GUERRA DI 1870
All'amicu SEATELLI
Texte dit par Marc GIORGI - Cliquer ici
Misereminimei, cume sò seccu !
Le miò osse si contanu in lu spinu ;
S'ella dura cusì, sò prestu leccu.
Aghiu lu corpu cume un biulinu,
E le miò gambe parenu ficchetti
O puru cume l' anche d' un zichinu.
Guarda i miò occhi cum'elli sò stretti ;
All' osse s' e attaccata la miò pelle ;
Avale poi nun mancanu difetti !
Oghie mi sò nimiche ancu le stelle,
E cu la sorte sò sempre in bischizzu
Perchè stata cun me sempre ribelle.
Sò almenu sette volte ch'io mi rizzu
Cu lu miò ventre tuttu pien di ventu...
Mi vergognu di dì ch' aghiu lu schizzu.
Andemu a i cabinetti a centu a centu,
E quandu ci mettimu in batterìa,
Sentu lu fraju chi getta spaventu.
Unu mi dumandò cun cortesìa :
Quale sì tu chi benti tantu forte ?
Io li risposi : sò Carlu Maria.
Era un amicu ch'avia poca sorte,
E quand'ellu mi disse le so pene,
Pene cruele assai più di morte :
Pazienza ! s' abreranu le catene
Chi ci leganu in Prussia tutti quanti ;
E chi sà soffre, ricumpensa ottene.
Intantu la madonna e tutti i santi
Pregheranu per noi miò caru amicu ;
E stà pur sente quellu co ti dicu :
L'avvenire serà megliu che avanti.