OMBRE

Nant'à e muraglie ingombre

D'attracci è di fiure sante,

A luce stacca, vacillante,

U minimu motu di l'ombre.

 

Ombre silenziose è scure

Cum'è l'anticu fuculare

È ghjumpate voltu e fiare

Pè radulcissi e stridure.

 

Avvuglinate di misteri,

Ombre d'una stonda chì passa,

Si contanu à voce bassa

E vechje fole di mazzeri.

 

Ombre in l'ombra ammansita

Cù vechji cori turmentati

È strani visi trasulcati

Da e vomere di a vita.

 

Alzanu una manu frusta,

Quella ch' hà strintu tante mani,

Pè rispinghje i lindumani

Di sulitudine inghjusta.

 

L'ochji fissanu u tizzone

È curanu ch' ell' ùn si spenga,

Sippuru ch'ellu si mantenga

U tempu d'un altra stagione.

 

Ch'ellu li tenga calde l'osse

È diffundi a dolce luce

Per a stradella chì cunduce

Finament' à l'ultime mosse.

 

Ombre, fumate di carmini,

Cennere di tempu spietatu

È ch' ell' hà immurtalizatu

A canzona di Pasqualini.

 

Ghjuvan Petru RISTORI