NATALE D'ERI

 

Da ch’i primi fiocchi di neve

Infiuravanu u cimale,

À l’avvicinà di Natale,

E stonde currìanu breve.

Cù l’ore diurne più scarse

S’andava ( prelebatu ghjocu )

Antivisti, pè fà u focu,

À circà quelle legne sparse

È i maiò, più caparecci,

Furavanu i natalecci.

 

Più natale s’avvicinava,

Più eramu camandulini.

Trascurrìamu i querini

Cum’è i poltri senza trava

O assicavamu à Zìa

Pè assaghjà quellu curcone

È strunavamu à Mammone

Cherenduli s’ella sapìa

Si u vechju barbutu, danciu,

Ci purterebbe qualch’aranciu.

 

Mentre ch’in piazza di a chjesa

Fiacculava u nostru focu,

A ghjente ghjunta d’ignilocu

Ciarlava pè burlà l’attesa.

Eiu, indè ‘ssa parapiglia,

Fighjendu brusgià i tizzoni,

Pensav’à i mio scamberoni

Spalancati nant’à a ziglia

Cù ghjuculelli è dulciume

In un decoru negrufume.

 

Inc’un chjarore siderale,

Nantu à a vìa lattea,

Quella stella di Galilea

Stradava u babbu Natale.

A ciccona à sdingulera,

Venìa à rompe l’incantu

Mentre chì un alitu santu

Dava fiatu à a brasgera

È à ‘ssu cennu cristianu

Calava l’impitu prufanu.

 

Nentr’à a chjesa spimpillante

È zuffula di paruchjani,

Pè una sera cristiani,

Ci ariulava,allupiante,

Un mischju di cera sculata

Cù l’aspru muscu di l’incensu

Chì anc’oghje, quandu ci pensu

Mi ne rivene a fumata

Cù e voci d’e giuvanotte

Chì cantavanu ‘ Dolce notte’.

 

Fighjavamu, abbagliacati,

U presepiu, opera d’arte

Cù rambelle di vischiu, sparte

È caracutu à i lati.

Natu in l’amore divinu,

Venutu pè squassà a tacca,

Tra u sumere è a vacca

C’era,radiosu, u bambinu.

Spessu in mè l’idea balla

Di l’omu Dìu in a stalla.

 

Ma trascorsu l’ora sulenne,

Muzzendu l’ultima preghera,

Sticciavamu à diruttera

Bramosi di gode e strenne.

C’era dinù a sopraccena

Secondu l’usu benedettu,

Di pulenda è di caprettu

È di dulciume ghjust’appena.

Eiu avìa altre brame

Chè superavanu a fame.

 

Mi tuccava à fà figura

È poi circà d’esse degnu

Di quelli ghjoculi di legnu

Chì eranu a mo primura,

Cù sei mine da dissegnu

È torna qualchì altr’incrochju…..

Mammone ripetìa l’ochju

E rucule o altru segnu.

Ùn c’era ch’è dui diritti :

Bocca piena o stassi zitti.

 

Ma compiu quella scurpacciata

In lettu, cù i nostr’attracci,

Era tempu d’addilettacci

Cumè tocchi da qualchì fata.

…..Quand’e stonde correnu breve,

À l’avvicinà di Natale,

A mio mente sparghjendu l’ale

Ariuleghja sopr’à a pieve

Preghendu chì, da u cimale

Affacchi l’anticu Natale.