Qui, da ste marine piane
Duve tutt'usu si perde,
Pensu spessu à e campane,
Quelle d'a Petra di Verde.
Nunda chè d'avelle intese
Vulterebbi in 'ssu paese.
E campane di a Petra
Chjoccanu in perfettu accordu,
So cum'è l'antica cetra *,
Hè per ciò ch'ùn mi ne scordu,
È dicu a i Petrullacci
S'elli volenu pensacci,
Pè l'anticu campanaru,
Artistu di prima forza,
Mettite qualchì denaru,
Fat'una statula in Tozza **,
Chi pè falle, ci vole a crede
Ci hà messu tempu è fede.
A dumenica, a mane,
Da u Muchju à u Muntichju **,
Un chjoccu d'isse campane
Mette tutt'ognunu in tichju
È fìn'à u Paisolu **
A gioia piglia u volu.
È pè u Sant'Agustinu,
A gran festa petrullaccia,
D'a bocca di San Gavinu
Fin'à Arcarotta, in faccia,
È da Chiatra a Sant'Andria
Sparghjenu tant'alegria.
He d'aostu, u vintottu.
D'a mane sin'à a sera,
Colla più d'un giuvanottu
A sunà à sbattagliera.
Tandu ogni paisanu
Si sente più cristianu.
Quand'ellu ghjunghje u vescu,
Pè crezimà chjucu è grende,
Cantanu Petru è Francescu
Cù e so voci tremende
In mentre chi a ciccona
Accumpagna ogni canzona.
D'a bocca di a Fuata
Fin'à quella d'u Purtellu
A natura s'hè spannata.
U cinghjale cù l'acellu,
Si ponu pagà u lussu
Di falà à beie in Bussu ***.
Tutt'issi ghjorni di festa,
Correnu senza timore,
Liberi, ind'a furesta.
Sanu chi u cacciadore
He abbastanza gentile
Per appende u fucile.
E a notte di Natale
Tempu natu u bambinu,
Da Chigliacci à a Nuvale,
Ind'u circulu vicinu,
Intronanu a cunfìna
Pè a nascita divina.
Da Mont'Obbiu a Sant'Appianu
È e sponde di Mont'Altu,
A quellu tempu landanu
Annunziavanu l'assaltu.
Oghje chjamanu 'gnilocu
S'ellu corre qualchì focu.
Certe sere, a l'attrachjata,
Facenu crepà u core.
Sopr’à tutta la burgata,
Quand’un paisanu more,
Sparghjenu tant’amarezza
Chi a curatella spezza.
Si sà chi un paisolu,
Di campane n’ha bisognu,
Più, per annunzià un dolu
Ch’è nascite o matrimoniu.
Ma a morte hè più umana
Inc’un chjioccu di campana.
Tù chi veni per un mese
- E trovi ch’ellu hè pocu -
A vede si su paese
Hè sempr’à listessu locu,
Da ‘sse cuntrate luntane
Pensa sempr’à e to campane.
Ghjuvan Petru RISTORI
* Ancu celerà o cetara.
** Lochi detti di a Petra.
*** Bussu, chjamatu ancu Fium'Alisgiani, da ch'ellu tocca a pieghja.
