In la macchia fiurita lu pastore
Briacu di profumi e d’amore
Volta e gira
E suspira
Eppoi cunfida
A la so cumpagnuccia, la cialambella,
Quant’è longu lu tempu in la macchiulella
Un ventigliolu chi gira fra le foglie
Suspresu da st’accenti, li ricoglie
E li trasporta
Di porta in porta.
Ogn’unu ascolta,
Ma in paese un cie che una zitella
Per capi ciochi canta a cialambella.
La sera lu pastore a la funtana
Dicendu : Quest’é l’acqua la piu sana
Ci s’arresta.
Ma lesta lesta,
Lu core in festa,
Attempu ad’ellu, ghiunghie la zitella
Per la quale cantò la cialambella.
Latu a latu rientrenu in paese
L’occhj di la zitella so lumere accese
E di lu pastore
Batte lu core
Ma l’ora core
E lasciendu a dispiacere la zitella
Ogni sera li dice : Si la piu bella,
Un cie che un tocca-manu e un surisu
Ma lu pastore si crede in paradisu
In su momentu
E spentu
Lu so tormentu.
Ma lu lindumane, in una macchiulella
Di novu suspira e pienghie la cialambella
