A MIO CASA
Si la morte troppu prestu nun mi piglia
CHERNAGHIU, vecchia casa di Babbone
Tu ch’io lasciai, ma non senza raggione,
Suddisffà bogliu la mio piu cara imbiglia.
Ritorneraghiu per nun mai piu lasciatti,
A vive in lu to senu, dolce suggiornu;
Ti ne feci prumessa, in quellu jornu,
E un corsu nun rinega li so patti.
Bogliu gode in cu te la primavera
Sente la statina li canti in l’aghia
E poi l’inbernu ave sta somma grazia ;
La veghia a lu fucone ogni sera.
Duve mi scorderaghiu di le fatighe
Parlendu in cu l’amici e li parenti
Di li nostri passati, di li so stanti,
Di l’usi persi, di mille cosi antiche.
Speru, cume tuttu quellu chi s’esilia
Di ritrovà sott’à l’amatu tettu,
Alegri e sani, a lu gran cumplettu,
Li membri cusi cari di la famiglia.
Mi terda di rivede u vaglinellu
Chi canta per te sola, a bassa voce,
Lu to fornu ascosu sott’à la noce,
E lu castagnu chi ti serve d’ombrellu.
Bogliu prega vicinu a la to croce
Tantu vecchia chi vacilla e si tarla
Apes’à lu to muru e chi ci parla,
Cume lu to nomme, d’un fattu atroce ;
Un ghiornu forse cambierai d’aspettu ;
Ma la to Croce ti sera cunservata
E sempre lu CHERNAGHIU serai chiamata
Di lu passatu avemu lu rispettu.
Sta Croce chi tantu intriga lu passente
Si tu sapisse quantu la tengu caru !
Si tu sapisse quantu l’esiliu m’e amaru !
Quantu lontan’da te lu cor mi sente !
Retour vers la page : Madeleine Banghala-Nicolai
