A CAPPELLUCCIA
Quandu nascenu li fiori
Quandu cantanu l’ocelli,
Chi spannanu li cerbelli
E chi spannanu li cori,
Lesta e alegra cume un picchiu
Mi ne collu a la cappella
Cogliendu la mercurella
E le friscie di bidichiu ;
E ne tess’una ghirlanda
A lu santu gloriosu,
Lu santu miraculosu
Chi suddisf'ogni dumanda.
Nant'à lu sigliare anticu
Posendu mi ci riposu
E ben chi l’usciu sia chiosu
Lu santu sa cioch’io dicu.
Le mio preghere PANCRAZIU
Sempre l’ha esaudite
E le ghirlande fiurite
Le li tessu per ringraziu.
Guidata da la so manu
Di fin ch’averraghiu vita
A la cappella gradita
Colleraghiu lesta o piano ;
A preghà per ch’ellu dia
Sempre a lu nostru paese
Le so grazie, le so prese
Ogni bene ; e cosi sia ;
Retour vers la page : Madeleine Banghala-Nicolai
