U MIO PAESE
1 - Quand’affaccu in Pinzu Rossu
Vecu i tre paisoli
Si stringhje stu core corsu
D’avelli lesciati soli
Soca ùn volse u destinu
Ch’io fussi sempre vicinu.
2 - U so bellu campanile
Mostra a so alta cima
Incu lu so bellu stile
Mi pare megliu che prima
U suvenire ùn si perde
Di a nostra Petra di Verde.
3 - U so nome fù ben datu
Dapertuttu c’é verdura
Incù dui fiumi à latu
Imbellisce a natura
U so celu sempre chiaru
Ogni fruttu ci matura.
4 - U guerdanu e ne sò fieri
Mont’Altu e Sant’Appianu
E so duie cime altiere
U curanu da lontanu
E più sottu c’é u mare
Chi mostra e so acque chiare.
5 - Mezu à sse duie muntagne
U collu di San Gavinu
L’erburi di e castagne
A l’intornu sò vicinu
O paese di cuccagna
Eria pura ùn si ne lagna.
6 - Da a croce du I Temponi
Vecu U Ciottu à Pischellu
San Petrone e I Rioni
Sant’Elesiu e U Prunellu
Tulloria e l’Aghja à A Serra
Bussu e U Duminichellu.
Retour vers la page : Antoine Straboni
