CUMARE VOLPE

 

CUMARE VOLPE

 

1 - Sta mane u capibiancu

Face perte di dovere

Ch’ella ùn si dica mancu

Ch’ell’ùn trova dispiecere

Sò sparite e ghjalline

Grisge rosse bianche e nere.

 

2 - Chi a volpaccia era infama

À m’avìanu sempre detta

Di pollame é sempre in brama

Ch’ella sìa maladetta

É ghjunta induve Michele

Per lescià a piezza netta.

 

3 - Unn ha guerdatu u mese

E senza teme u callu

Lontanu da u paese

Stu colpacciu é ghjunta à fallu

Ha polzu molte ghjalline

E s’ha lesciatu u ghjallu.

 

4 - L’é stata ricunniscente

Ch’é ellu chi l’ha chjamata

Cantava bellu sevente

A matina e in la serata

Ghjé venuta a risposta

Fù un’ora ghjestimata.

 

5 - I cani di u vicinatu

Unn hanu trovu pretesti

Unn hanu manc’abbaghjatu

E sò stati pocu lesti

Pensavanu chi a volpe

L’avessi da lescià i resti.

 

6 - Eranu appollate in altu

Per avè più bella vista

A volpe à u primu saltu

L’ha resu a vita trista

Michele l’ha ingrassate

E ssa ladra é s’acquista.

 

7 - Di u ghjallu amutulitu

Ùn si sente più u cantu

Troppu terdi ell’ha capitu

Ch’ell’unn avìa più per tantu

Di salvassi un’altra volta

Ha pregatu u so santu.

 

8 - Avanti di perde vita

Ha persu i so diritti

Troppu terdi l’ha capita

Ch’ell’é megliu à stassi zitti

Riposassi e dorme terdi

Micca d’esse à l’alba arritti.

 

9 - Deraghju un cunsigliu à d’altri

E finiscu a miò musa

À chi ha ghjalline e pollastri

Tenghi a so porta chjusa

Chi a volpe ha catellatu

Cherne fresca ùn ne ricusa.

 

Degordì, Calcinaghjole, lugliu 1992

 

 

Retour vers la page : Antoine Straboni